(အာဇာနည်ကြီးများ ဂုဏ်ပြု ဆောင်းပါး)

မိုးသည် တဖွဲဖွဲ ရွာသွန်းလျက် ရှိလေသည်။ ၁၉၄၇ ခုနှစ် ဇူလိုင် ၁၉ ရက် ညနေစောင်း အချိန် ဖြစ်လေသည်။

မြို့ပိုင် မောင်ပြုံးချို၏ အိမ်တွင် ပြည်သူ့ ဆက်ဆံရေး ရေဒီယိုကို စတင် ဖွင့်လေပြီ။ နေ့တိုင်းဆိုလျှင် ဌာနက ပေးထားသော ရေဒီယို နားထောင်သူတွေ အတော်များများ ရှိသော်လည်း ယနေ့ မိုးရွာနေသဖြင့် လူပါးလှသည်။ အိမ်အတွင်းတွင် အိမ်သားမှအပ  အမိန့်တော်ရ ရှေ့နေကြီး ဦးအုံးဖေ တစ်ယောက်သာ ရှိသည်။ အိမ်ပြင်ဘက် ခုံတန်းလျား ပေါ်တွင် သုံးလေးယောက်သာ ရှိသည်။ တစ်မြို့လုံးမှ ရေဒီယို တစ်လုံးသာ ရှိလေသည်။

ပဏာမ ဓာတ်ပြား ဖွင့်ပြီးသည်နှင့် တစ်ပြိုင်နက် ရန်ကုန် ခရိုင် ရာဇဝတ် တရားသူကြီး ဦးဘသွယ်၏ နေဝင်မီးငြိမ်း အမိန့်ကို ဖတ်ကြားလေ သည်။ မောင်ပြုံးချိုသည် ခေါင်းကြီး သွားလေသည်။

အင်း ရန်ကုန်မှာတော့ တစ်ခုခု ဖြစ်ပြီ၊ ဦးအုံးဖေသည် မည်သို့မျှ ပြန်မပြောဘဲ ခေါင်းညိတ် နားထောင် နေလေသည်။အဓိကရုဏ်း များ ဖြစ်သလားမသိဘူး။ မောင်ပြုံးချိုက ပြန်ပြောလေသည်။အဓိကရုဏ်းတော့ ဟုတ်မယ် မထင်ပါဘူးဟု ဦးအုံးဖေက ဆိုသည်။ပုလိပ်တွေများ အကုန်လုံး သပိတ်မှောက် ကုန်သလားပဲ။ဒါလည်း ဟုတ်မယ် မထင်ဘူး။ ပြောရင်းဆိုရင်း ရေဒီယိုက အောက်ပါအတိုင်း ကြေညာပြန်လေသည်။

သောတရှင်များကို အထူး အစီရင်ခံလို တာကတော့ ယနေ့ည ခုနစ်နာရီနှင့် ဆယ့်ငါးမိနစ် အချိန်တွင် ဤအသံလွှင့်ရုံမှ နေ၍ အထူး အရေးကြီးသော သတင်း တစ်ရပ်ကို အသံလွှင့် ပါလိမ့်မယ်။

ဟော မြို့အုပ်မင်း။ ရန်ကုန်မယ် တစ်ခုခု ဖြစ်တာတော့ သေချာပြီ။ ဦးအုံးဖေက မှတ်ချက် ချပြန်လေသည်။မောင်ပြုံးချို တို့သည် ခုနစ်နာရီနှင့် ဆယ့်ငါးမိနစ် ရှိရန် တိုင်ကပ် နာရီကြီးကိုတမော့မော့နှင့် ကြည့်ရှု စောင့်နေ ကြလေသည်။ စာမေးပွဲ ဖြေဆိုသော အခါတွင် နာရီလက်တံသည် မြန်မြန်ကြီး သွားသလောက် အချိန်ကို ရောက်ချင်ဇောနှင့် စောင့်မျှော်သော အခါ ကြန့်ကြာလှသည်။ သည်အတောအတွင်း ရန်ကုန် အရေးပိုင်၏ နေဝင်မီးငြိမ်း အမိန့်သည်လည်း ထပ်တလဲလဲ ထွက်ပေါ် နေလေသည်။ညခုနစ်နာရီနှင့် ဆယ့်ငါးမိနစ် အချိန် ဖြစ်လေသည်။

''အသံလွှင့်ရုံ အတွင်းရှိ နာရီအရ မြန်မာ စံတော်ချိန် ခုနစ်နာရီနှင့် ဆယ့်ငါးမိနစ် ရှိပြီး ဖြစ်ပါ၍ မြန်မာပြည် ဘုရင်ခံ မင်းကြီး ဆာဟူးဘတ်ရန့်(စ်)က အရေးကြီးသော သတင်း တစ်ရပ်ကို ကြေညာ ပါလိမ့်မည်'' ဟူသော အင်္ဂလိပ် ဘာသာဖြင့် နိဒါန်းစကား ထွက်ပေါ်လာလေသည်။မောင်ပြုံးချို တို့သည် အငြိမ်ကြီး ငြိမ်နေကြလေသည်။

မြန်မာပြည် ဘုရင်ခံ မင်းကြီး တိုင်းသူပြည်သား တို့အား ဝမ်းနည်းစွာနှင့် ကျွန်ုပ် ကြေညာရမည်မှာ ယနေ့နံနက် ၁ဝ နာရီတွင် လက်နက် စွဲကိုင်သော လူတစ်စုက ဝန်ကြီးများ အစည်းအဝေး ပြုလုပ်နေစဉ် ဝင်ရောက် တိုက်ခိုက်ရာ ဦးအောင်ဆန်းနှင့် တကွ အခြား ဝန်ကြီး ငါးဦး သေဆုံးသွားကြောင်း -နောက်စကားတွေကို မကြားနိုင်တော့ချေ။ မောင်ပြုံးချိုရော ဧည့်သည်ပါ ဟင်ဟူသော အာမေဍိတ်များကို ရွတ်ဆိုလျက် နေရာမှ ငေါက်ခနဲ ထလိုက်ကြ လေသည်။ မောင်ပြုံးချိုသည် ထိုင်၍လည်း မနေနိုင်၊ ရပ်၍လည်း မနေနိုင်။ အိမ်ထဲတွင် လူးလာဆန်ခတ် နေလေသည်။ အသည်းနှလုံး တို့သည် တဆတ်ဆတ် ခါနေလေသည်။ ဘုရင်ခံ မင်းကြီး အင်္ဂလိပ် ဘာသာနှင့် ဆက်လက် ပြောဆို သွားသည်ကိုမှ သူ မကြားလိုက် တော့ချေ။

နောက်မှ သတိရ၍ ဧည့်သည်ရော မောင်ပြုံးချိုပါ ရေဒီယို ခုံအောက်တွင် ဆောင့်ကြောင့်ထိုင်၍ နားထောင်ကြလေသည်။ စိတ်နှလုံး ထိခိုက်လှသော သတင်း စကားများကို တိုတိုတုတ်တုတ် ကြေညာပြန်လေသည်။

အခြား သေဆုံးသူ များမှာ ဘဏ္ဍာရေး ဝန်ကြီး သခင်မြ၊ အလုပ်သမား ဝန်ကြီး မန်းဘခိုင်၊ သတင်း ဖြန့်ချိရေးနှင့် ဝါဒဖြန့်ဖြူးရေး ဌာနဝန်ကြီး ဒီးဒုတ် ဦးဘချို၊ ပညာရေး ဝန်ကြီး မစ္စတာ အပ္ပဒူရာဇာတ်၊ ကူးသန်း ရောင်းဝယ်ရေးနှင့် ထောက်ပံ့ရေး ဝန်ကြီး ဦးဘဝင်းတို့ ဖြစ်ကြောင်း။ မောင်ပြုံးချိုသည် ဆက်လက်၍ မကြားလိုတော့။ ထိုင်ရာမှ ထပြန်လေသည်။ ထရာမှလည်း ပြန်၍ ထိုင်ပြန်လေသည်။ တင်မကြီးတို့ လူသိုက်လည်း အိမ်ပေါ်မှ အပြေးအလွှား ဆင်းလာ ကြပြန်လေသည်။

ဘယ့်နဲ့ ဘယ်နဲ့ ဗိုလ်ချုပ် အသတ်ခံရတယ်လို့ ကြားလိုက်တယ်။  ဟုတ်ရဲ့လား။ တင်မကြီးက မောကြီးပန်းကြီးနှင့် မေးလေသည်။ သူသည် အိမ်ပေါ်မှ အသံကိုကြား၍ ဆင်းလာခဲ့ခြင်း ဖြစ်သည်။ သူ့နားကို သူမယုံ၊ အဝေးက ကြားရသူကို မဆိုထားနှင့်။ ဘုရင်ခံ မင်းကြီး ကြေညာချက်ကို ရေဒီယိုမှ တပ်အပ်ကြား လိုက်ရသော မောင်ပြုံးချိုပင်လျှင် ဟုတ်မှ ဟုတ်ပါမည်လောဟု သံသယ ဖြစ်နေသေးသည်။ မဟုတ်ပါစေနဲ့ ဟူ၍လည်း အတွင်းက ကြိတ် ဆုတောင်းမိသည်။ မှား၍ ကြေညာသော သတင်းဖြစ်ပါစေ ဟူ၍လည်း ဆုတောင်း မိသေးသည်။

''ဟုတ်တယ်ကွဲ့၊ ဗိုလ်ချုပ်နဲ့ ဝန်ကြီးငါးဦး အသတ်ခံ ရရှာပြီ''ဟု မောင်ပြုံးချိုသည် တုန်ရင်သော အသံဖြင့် ပြန်ဖြေလိုက်၏။

အမယ်လေး ရက်စက်ကြပါပေ့ဟု တင်မကြီးက ငိုသံပါကြီးနှင့် ရေရွတ်လေသည်။

ထိုသတင်း ပြီးသွားသော အခါ ဂီတသံကို ရေဒီယိုမှ ဆက်လက် ကြားနေရပြန်ရာ ကဲ ပိတ်ထား လိုက်ပါတော့ဗျာ၊ ဒါတွေ မကြားချင်ပါဘူးဟု ဧည့်သည်က ဆိုသည်။ မောင်ပြုံးချိုလည်း ချက်ချင်းထ၍ ပိတ်လိုက်လေသည်။ ပဇ္ဇုန်မိုး ကလည်း သဲသဲကြီး ရွာသွန်းဖြိုး နေလေသည်။

ဤသတင်းသည် တောမီးကဲ့သို့ မြို့အားလုံးကို ပျံ့နှံ့သွားလေ၏။ မောင်ပြုံးချို၏ အိမ်သို့ လူအများ အလျှိုလျှို ရောက်လာကြလေသည်။ ထိုသတင်းသည် မှန်ပါ၏လောဟု လာရောက် စုံစမ်းကြလေသည်။ မှန်ကြောင်း အဖြေကို ရရှိသောအခါ စုတ်သပ်ကြကုန်၏။ အကြံစုတ်ပဲ့ ပါပေရဲ့ဟု မှတ်ချက်ချကုန်၏။ ''ရက်စက် ပါပေရဲ့''ဟုလည်း ဆိုကြကုန်၏။ ဗိုလ်ချုပ် တစ်ဦးတည်း မဟုတ်သေး။ အခြား ဝန်ကြီးများလည်း ဗိုလ်ချုပ်နှင့် တစ်ပါတည်း အသတ်ခံရကြောင်း ပြောသောအခါ အလိုလေး။ ဗမာပြည်ကြီးတော့ ဇာတ်မျောပါပြီ ဟူ၍လည်းကောင်း၊ ခေါင်းဆောင်ကြီးတွေ အကုန်ချောကုန် ပါပကော ဟူ၍ လည်းကောင်း၊ ဝမ်းနည်း ပက်လက်နှင့် မြည်တမ်းကြ ကုန်၏။

သည်အကြောင်းကို ပြောရင်း၊ သည်အကြောင်းကို ဆွေးနွေးရင်း၊ သည်အကြောင်းကို ထင်မြင်ချက် ပေးရင်းနှင့်ပင် ညဥ့်နက် ရလေတော့သည်။

နံနက်မိုးလင်းလျှင် မောင်ပြုံးချို၏ စိတ်သည် ထိုင်းမှိုင်း တွေဝေလျက် ရှိ၏။ ညက ကောင်းကောင်း အိပ်မပျော်သဖြင့်လည်း ခေါင်းတစ်ခုလုံး အုံ၍နေ၏။

တစ်ညလုံး သည်အကြောင်း တွေကိုသာ တွေးတော နေမိသည်။ အိပ်လည်း သည်စိတ်၊ စားလည်းသည်စိတ်၊ အိပ်ပျော် နေလျှင်လည်း အိပ်မက်ထဲတွင် သည်စိတ်၊ မည်သည့် အလုပ်ကိုမှလည်း လုပ်ကိုင်လိုစိတ် မရှိ။ တစ်ကိုယ်လုံးသည် လေးကန်လျက် ရှိလေတော့သည်။

သည်နေ့မှ ရွာတစ်ရွာသို့ အမတော်ကြေး ပေးရန် ချိန်းဆိုထားပြီး ဖြစ်နေပြန်သည်။ လူပေါင်း နှစ်ရာခန့်ကို ချိန်းဆိုထားပြီး ဤသတင်းဆိုးကြောင့် ပျက်ကွက် ရမည်ဆိုလျှင် အကြောင်း မဟုတ်သေး။

အမတော်ကြေး ပေးရမည့် အတွက်လည်း ရဲဘော်တွေ၊ နိုင်ငံရေး ခေါင်းဆောင်တွေ၊ လယ်သမားတွေ မြစ်ကမ်းပါးပေါ်တွင် စောင့်မျှော် နေကြ သည်။  မော်တော်မှ ကမ်းကို မဆိုက်ရသေး၊ ဗိုလ်ချုပ် သေနတ်ပစ် ခံရတယ်ဆိုတာ ဟုတ်ပါသလားဟု မေးကြသည်။ မောင်ပြုံးချိုက ချက်ချင်း ပြန်မဖြေနိုင်၊ လည်ချောင်းတွေ တစ်ဆို့လျက် ရှိသည်။ ခေါင်းကိုသာ ညိတ်၍ ပြလိုက်သည်။ ကုန်းပေါ်သို့ ရောက်မှ ဗိုလ်ချုပ် တစ်ဦးတည်းသာ မဟုတ်၊ အခြားဝန်ကြီး ငါးဦးသည် ကွယ်လွန်လေပြီဟု ပြောလိုက်သော အခါ စုတ်တသပ်သပ် ဖြစ်ကြကုန်သည်။ ရဲဘော်တစ်ဦး၏ ငိုရှိုက်သံကိုလည်း ကြားရလေသည်။ ဆူဆူညံညံနှင့် အမတော်ကြေး ထုတ်ရန်ရောက်ရှိနေသော လယ်သမားများ ထိုသတင်းဆိုးကြောင့် အငြိမ်ကြီး ငြိမ်သွား ကြလေသည်။ သူတို့သည် စကားကိုမျှ ကျယ်ကျယ်မပြောကြတော့ချေ။ သူတို့သည် ဗိုလ်ချုပ်ကို ဓာတ်ပုံထဲတွင်သာ မြင်ဖူးသူများ ဖြစ်ကြသည်။ ဗိုလ်ချုပ်စကား ပြောသည်ကိုလည်း သူတို့မကြားဖူး၊ သူတို့ နားလည်သည်ကား လွတ်လပ်ရေးသည် မကြုံစဖူး ထူးကဲသော အရသာနှင့် ပြည့်စုံသည်။ ထိုလွတ်လပ်ရေး စခန်းသို့ ဗိုလ်ချုပ် အမှူးရှိသော ကွယ်လွန်သူ ဝန်ကြီးများသည် သူတို့အား ပို့ဆောင်လျက် ရှိသည်ဟု ယုံကြည်သည်။ ယခုသော် သူတို့အားထား မှီခိုရာ ခေါင်းဆောင်ကြီးများ ရက်စက်စွာ အသတ်ခံရသည် ဟူသော သတင်းကြောင့် တုန်လှုပ် ချောက်ချားကုန်သည်။ ဝမ်းနည်း ကြေကွဲကုန်သည်။ အားငယ်ကုန်သည်။

မောင်ပြုံးချိုသည် ပြုဖွယ် ကိစ္စများ ဆောင်ရွက်ပြီးနောက် ရုံးစိုက်ရာမြို့သို့ ချက်ချင်း ပြန်လာခဲ့လေသည်။ ထိုနေ့ည မောင်ပြုံးချို၏ အိမ်တွင်းရော၊ အိမ်ပြင်ပါ လူများ ပြည့်ကျပ်လျက် ရှိလေသည်။ သူတို့သည် မကြားလိုသော သတင်းကိုပင် ထပ်မံ နားထောင်ရန် ရောက်ရှိ နေကြပြန်လေသည်။

ယမန်နေ့က ဒဏ်ရာ ရရှိသွားသော တောင်တန်းနယ် ဝန်ကြီး မိုင်းပွန်စော်ဘွားကြီး စဝ်စံထွန်းသည် ရရှိသော ဒဏ်ရာနှင့်ပင် ဆေးရုံကြီးတွင် ကွယ်လွန်ပြီ ဖြစ်ကြောင်း ဟူ၍ ရေဒီယိုမှ ကြေညာ ပြန်လေသည်။ ဤတွင် မကသေး အတွင်းဝန် ဦးအုံးမောင်နှင့် သက်တော်စောင့် မောင်ထွေးတို့ပါ သေဆုံးကြကြောင်း ကြားရပြန်လေသည်။

မောင်ပြုံးချိုတို့၏ ရင်တို့သည် ဆတ်ဆတ်ခါမျှ တုန်လှုပ် ပြန်လေသည်။နောက်တစ်နေ့တွင် ဗိုလ်ချုပ်တို့ ကျဆုံးသည့် အတွက် ဝမ်းနည်းသော အထိမ်းအမှတ် အဖြစ်ဖြင့် လူထု အစည်းအဝေး ပွဲကြီးတစ်ရပ် ကျင်းပကြသည်။ အစည်းအဝေး ကျင်းပသည့် နေရာမှာ ယာယီ ဇာတ်ရုံကြီး၏ အတွင်းတွင် ဖြစ်သည်။ ဗိုလ်ချုပ်ရုပ်ပုံကြီးနှင့် တကွ ကျဆုံးသော အခြား ခေါင်းဆောင်ကြီးများ၏ ပုံကို ရနိုင်သလောက် စုဆောင်း ရှာဖွေပြီးလျှင် စင်မြင့်ပေါ်တွင် ချိတ်ဆွဲ ထားကြသည်။ အဖွဲ့အသီးသီး၏ လွမ်းသူ့ပန်းခွေ များကိုလည်း ပုံကြီးများ၏ ရှေ့တွင် ချထားကြလေသည်။

အစည်းအဝေး ပွဲတွင် ဗိုလ်ချုပ်တို့အား အလေးပြုခြင်း၊ ဝမ်းနည်းသော အထိမ်းအမှတ်နှင့် မိနစ် အနည်းငယ် ငြိမ်သက်စွာ ရပ်တည်ခြင်း အစရှိသည် များကို ပြုလုပ်ကြသည်။ ပြီးလျှင် မြို့ပေါ်ရှိ ခေါင်းဆောင် အသီးသီးက တစ်ယောက်တစ်လှည့် စကားထပြော ကြလေသည်။ ဗိုလ်ချုပ်နှင့် တကွ ကျဆုံး လေပြီးသော ခေါင်းဆောင်ကြီးများကို မိမိတို့ သိသလောက် တိုင်းပြည် အတွက်  ဆောင်ရွက် ခဲ့ပုံများကို ချီးကျူး ပြောဆို ကြကုန်သည်။ ဂုဏ်ပြုကြသည်။ မောင်ပြုံးချိုကလည်း သူ့အလှည့် ရောက်သော် ထ၍ စကားပြောသည်။သူကလည်း သူသိသော ဗိုလ်ချုပ်အကြောင်းကို ပြောလေသည်။ သည်တွင် မကသေး။  သူကအနည်းငယ် အတွန့်တက် လိုက်သေးသည်။

ကျွန်တော် နိဂုံးချုပ် အနေနဲ့ ပြောချင်တာကတော့ ကျွန်တော်တို့ ဗိုလ်ချုပ်ကို ချစ်လျှင် ဗိုလ်ချုပ် မြတ်နိုးတဲ့ လွတ်လပ်ရေးကြီးကို အရယူ နိုင်အောင် ကြိုးစားကြဖို့ပဲ။ ကျွန်တော်တို့ ဗိုလ်ချုပ်ကို လေးစားလျှင် သူမြတ်နိုးတဲ့ လွတ်လပ်ရေးကြီး အဓွန့်ရှည်စွာ ခိုင်မြဲအောင် ထိန်းသိမ်းဖို့ပဲ။ ဒီကိစ္စနဲ့ ပတ်သက်ပြီး ကျွန်တော်တို့ မြတ်စွာဘုရားကြီး ပရိနိဗ္ဗာန် စံခါနီးမယ် ညီတော် အာနန္ဒာကို မိန့်ကြားပုံ ကလေး သတိရမိတယ်။ မြတ်စွာဘုရား ပရိနိဗ္ဗာန် ပြုတော့မယ် ဆိုတာသိတော့ ညီတော် အာနန္ဒာက အလွန်ပူဆွေးပြီး ရှိုက်ကြီးတငင် ငိုကြွေးနေတာ မြင်တဲ့အခါ မြတ်စွာ ဘုရားက  ''ချစ်သား အာနန္ဒာ၊ ငိုကြွေး မြည်တမ်းနေခြင်းဖြင့်  ငါဘုရားကို ချစ်မြတ်နိုးသည် မမည်။ ငါဘုရားကို တကယ်ချစ်ခင် မြတ်နိုးပါလျှင် ငါဘုရား မရှိသည့်နောက် ငါဘုရား ဟောကြားတော် မူခဲ့သော တရားတော် အတိုင်း ကျင့်ကြံပါလေ''ဟု မိန့်ကြားတော် မူသတဲ့။ ဒီနေရာမှာလည်း ဗိုလ်ချုပ်ကို တမ်းတငိုကြွေး နေသည်ထက် ဗိုလ်ချုပ်ကို တကယ်တမ်း ချစ်ခင်ရင် လူ့လမ်းစဉ် အတိုင်း လိုက်ပြီးလုပ်ကိုင် ဆောင်ရွက်ကြဖို့ပဲ ရှိပါတော့တယ်ဟု ပြောလိုက်လေသည်။    ။

(ပညာရေး ဝန်ကြီးဌာန  ကျောင်းသုံး စာအုပ်ကော်မတီမှ ထုတ်ဝေသော  ပင်ရင်းစကားပြေ လက်ရွေးစင်မှ  ကောက်နုတ် ဖော်ပြသည်။)

 

 

 

Read 394 times
Rate this item
(1 Vote)